Tímabilið 2025 fer í sögubækurnar fyrir þær sakir að vera fyrsta tímabilið í sögu meistaraflokks karla í efstu deild. Undirbúningstímabilið gekk vel og það komu sterkir leikmenn til liðs við félagið. Um mitt sumar var útlitið mjög gott og Afturelding statt um miðja deild. Á seinni hluta tímabilsins fóru sigrarnir að láta standa á sér og of mikið af jafnteflum urðu okkur dýrkeypt þegar uppi var staðið sem endaði með falli.

Það er hins vegar ljóst að frammistaða liðs, sem var í efstu deild í fyrsta sinn, var góð enda ekkert um stóra skelli og liðið tók stig af öllum liðum í deildinni nema einu. Bestu lið deildarinnar voru lögð af velli á Malbiksstöðinni að Varmá  enda heimavöllurinn  sterkur. Frábær stuðningur Mosfellinga skipti sköpum og stemningin var eftir því.

Við höfum að mínu mati sýnt með frábærum frammistöðum að liðið á heima á meðal þeirra bestu og kemur ekkert annað til greina en að fara upp um deild á næsta tímabili. Vonandi hafa Mosfellingar sömu trú á þessu verkefni og strákarnir í liðinu og mæta áfram á völlinn til að styðja við strákana okkar.

Gísli Elvar Halldórsson

Formaður meistaraflokksráðs karla