Starfsemi barna- og unglingaráðs knattspyrnudeildar hélt áfram að vaxa og dafna á árinu 2025. Við erum stolt af stærstu einingu félagsins og horfum björtum augum til framtíðar.
Liverpool skólinn og Gæðabakstursmótið voru á sínum stað yfir sumartímann og var ánægjulegt að sjá hversu vel allt fór fram. Deildin vill þakka öllum þeim sjálfboðaliðum sem komu að þessum verkefnum alveg kærlega fyrir þeirra framlag enda mikilvægur fjáröflunarliður í rekstri deildarinnar. Í ár var fyrsta skipti sem Gæðabakstursmótið var haldið á tveimur helgum og heppnaðist það fyrirkomulag vel að hafa ekki allt mótið sömu helgi og bæjarhátíðin.
4.flokkur kvenna gerðu sér lítið fyrir og lentu í 2.sæti á Barcelona cup eftir naumt tap á móti Austurrísku liði, vel gert stelpur og framtíðin er björt fyrir meistaraflokkinn okkar!
Yfir sumartímann voru verkefnin fjölbreytt. Yngstu flokkarnir stóðu sig einnig vel á stærstu mótum sumarsins. N1 mótið á Akureyri, Símamótið í Kópavogi, TM/Orku mótin í eyjum, Króksmótið fyrir norðan, Norðurálsmótið upp á Skaga og fleiri mót tóku vel á móti iðkendum Aftureldingar sem voru félaginu til sóma bæði innan sem utan vallar. Íslandsmótið er svo alltaf hápunktur sumarsins hjá okkar elstu flokkum þar sem lotukerfið gefur iðkendum leiki jafnt og þétt yfir stóran hluta ársins. Þúsund þakkir til foreldra og forráðamanna sem gera öll þessi verkefni svo miklu auðveldari með sinni hjálp.
KSÍ VERKEFNI
Nokkrir iðkendur fengu það skemmtilega tækifæri að taka þátt í landsliðsverkefnum og er það mikill heiður.
| Hæfileikamótun | ||||
| Sigrún Agnes Smáradóttir | Aron Daði Jónsson | |||
| Andrea Karí Egilsdóttir | Alex Lúðvíksson | |||
| Júlía Bríet Smith | Ari Hrafn Haraldsson | |||
| Landsliðsverkefni U15 | Landsliðsverkefni U16 | |||
| Ari Hrafn Haraldsson | Katla Ragnheiður Jónsdóttir | |||
| Hólmfríður Birna Hjaltested | Hólmfríður Birna Hjaltested | |||
| Katla Ragnheiður Jónsdóttir | ||||
| Landsliðsverkefni U17 | Landsliðsverkefni U21 | |||
| Róbert Agnar Daðason | Arnar Daði Jóhannesson | |||
Mikil fjöldi iðkenda sótti knattspyrnuskólann eins og fyrri ár og er virkilega gaman að fylgjast með þeim dafna og taka framförum
Í knattspyrnuskólanum læra krakkarnir grunnatriðin í knattspyrnu og þeir sem eru lengra komnir fá verkefnið við hæfi. Undanfarin ár hefur verið sett upp akademía sem iðkendur í 4. og 5. flokki geta sótt þar er farið yfir ákveðin atriði sem eiga styrkja iðkendur á þeim aldri. Markmenn fá sitt pláss og þar eru markmannsþjálfara deildarinnar að störfum. Mikil ánægja er hjá iðkendum og hefur akademían verið vaxandi.