Nýtt þjálfarateymi tók við meistaraflokknum í upphafi leiktímabilsins; Stefán Árnason sem áður var aðstoðarþjálfari tók við sem aðalþjálfari og Daníel Berg tók við sem aðstoðarmaður Stefáns. Daníel hafði áður þjálfað fjórða flokk karla við góðan orðstír. Töluverðar breytingar voru á leikmannahópnum þar sem tveir af reynslumestu og markahæstu leikmönnum liðsins fóru erlendis í atvinnumennsku; Blær Hinriksson til Leibzig í efstu deild í Þýskalandi og Birgir Steinn til Savehof í efstu deild í Svíþjóð. Það er auðvitað fagnaðarefni fyrir okkur sem félag að leikmenn okkar nái að þróa og bæta leik sinn hjá félaginu og taka svo stóra skrefið í atvinnumennskuna. Við erum afar stolt sem klúbbur af slíku afreksstarfi og hafa nú þrír leikmenn á nýliðnum árum farið í öflug atvinnumannalið. Blær og Birgir Steinn hafa báðir staðið sig gríðarlega vel hjá sínum liðum í vetur og fylgjumst við stolt með úr fjarlægð. Nokkrir nýir leikmenn gengu til liðs við félagið; Oscar Lykke kom frá Ringsted í Danmörku, Ágúst Ingi kom frá Gróttu og mosfellingurinn Haraldur Björn kom aftur heim eftir dvöl hjá Fjölni. Ljóst var að leikmannahópurinn var nokkuð breyttur og var það verkefni haustsins að slípa liðið saman.

Leiktímabilið fór gríðarlega vel af stað og þegar jólafríið kom vorum við í öðru sæti í deildinni, en töpuðum naumlega fyrir FH í átta liða úrslitum í bikarkeppninni. Eftir áramót fór leiktímabilið af stað í byrjun febrúar. Liðinu okkar gekk brösuglega að finna fyrsta sigurinn eftir áramót, sem þó kom að lokum. Lokaniðurstaðan eftir deildarkeppnina var sjötta sætið og einvígi við Hauka fram undan í átta liða úrslitum. Eftir þrjá leiki við Hauka fór svo að við töpuðum einvíginu 2-1, eftir oddaleik að Ásvöllum. Liðið okkar sýndi sitt rétta andlið í leik tvö á heimavelli en því miður voru Haukar of stór biti í þetta skiptið. Að loknu leiktímabili var tekin ákvörðun um að segja upp samningi við aðalþjálfara liðsins.

Stjórn deildarinnar þakkar Stefáni kærlega fyrir mikið og gott starf fyrir deildina á undanförnum árum og óskar Stefáni velfarnaðar í sínum störfum. Þegar þetta er skrifað að þá er stjórn deildarinnar á lokametrunum að ráða inn nýtt þjálfarateymi fyrir komandi leiktímabil. Margir ungir leikmenn fengu tækifæri á yfirstandandi leiktímabili og gott betur enn það. Við erum með  gríðarlega spennandi lið í höndunum þar sem undirstaðan eru uppaldir leikmenn. Við munum halda áfram að byggja meistaraflokkinn okkar upp á þeim kjarna sem nú er til staðar. Við erum með stóran hóp af leikmönnum og með réttu teymi og hugarfari er okkar liði allir vegir færir á komandi leiktímabili.