Skýrsla barna- og unglingaráðs
Á liðnu vori urðu umtalsverðar breytingar á stjórn barna- og unglingaráðs handknattleiksdeildar. Sveinn Líndal tók við formennsku ráðsins í kjölfar fráfalls Ólafs Gísla Hilmarssonar.
Starfsemi ráðsins hefur haldið áfram að þróast og eflast, þrátt fyrir að ný stjórn hafi þurft að tileinka sér umfangsmikil verkefni á skömmum tíma.
Hlutverk barna- og unglingaráðs
Hlutverk barna- og unglingaráðs er margþætt og snýr að skipulagi og utanumhaldi yngri flokka starfs deildarinnar. Helstu verkefni ráðsins eru að:
- Halda utan um allt starf yngri flokka,
- Annast fjármál yngri flokka, þar með talið gerð fjárhagsáætlunar með hliðsjón af æfingagjöldum og ráðningu þjálfara,
- Sjá um mótahald að Varmá fyrir Íslandsmót yngri flokka í samstarfi við HSÍ.
Markmið barna- og unglingaráðs
Markmið ráðsins eru skýr og beinast að því að:
- Tryggja að iðkendur njóti sín í starfinu og hafi ánægju af þátttöku sinni,
- Fjölga iðkendum innan deildarinnar,
- Stuðla að stöðugum framförum iðkenda, bæði á íþróttalegum og persónulegum vettvangi.
Nýjungar á liðnu starfsári
Á liðnu starfsári var ráðist í ákveðnar breytingar til að efla starf yngri flokka. Æfingatímabil 5. og 6. flokks var lengt um einn mánuð með það að markmiði að auka samfellu í þjálfun og bæta árangur iðkenda. Þá er fyrirhugað að standa fyrir fimm sumarnámskeiðum sem ætlað er að efla þátttöku og áhuga iðkenda yfir sumartímann.
Starfsemi og helstu verkefni ársins
Alls voru 302 iðkendur skráðir í yngri flokkum deildarinnar á árinu, skipt í 10 flokka. Þar af voru 113 stelpur í 4 flokkum og 207 strákar í 6 flokkum.
Nokkrar áskoranir hafa verið í kvennastarfi deildarinnar, einkum vegna fámennis í 3. og 5. flokki. Engu að síður er horft með bjartsýni til framtíðar, þar sem yngri flokkar eru sterkir og njóta handleiðslu reyndra þjálfara.
Drengjamegin hefur áskorun frekar snúist að fjölda iðkenda í flokkum og takmarkaðs æfinga- og keppnisttíma. Æfingastarf og keppni hafa þó gengið vel og samstarf við þjálfara verið gott.
Metnaður er fyrir hendi til að efla kvennastarf enn frekar með það að markmiði að fjölga uppöldum leikmönnum í meistaraflokki félagsins og styrkja þannig stöðu liðsins til lengri tíma litið.
Barna- og unglingaráð stóð fyrir þremur mótum á árinu, einu fyrir áramót og tveimur eftir áramót. Framkvæmd mótanna tókst vel í alla staði og vill stjórnin koma á framfæri þökkum til allra þeirra sem komu að undirbúningi og framkvæmd þeirra.
Stefán Árnason, sem gegnt hefur starfi yfirþjálfara í fullu starfi, hefur látið af störfum. Unnið er að ráðningu nýs yfirþjálfara.
Lokaorð
Starf barna- og unglingaráðs er mikilvægt fyrir uppbyggingu og framtíð handknattleiksdeildarinnar. Áfram verður lögð áhersla á að efla starfið, styrkja umgjörð yngri flokka og skapa iðkendum jákvætt og uppbyggilegt umhverfi til æfinga og keppni.
Ráðið vill færa þjálfurum, iðkendum, foreldrum og öllum þeim sem lagt hafa starfinu lið á árinu sínar bestu þakkir fyrir samstarfið.