Meistaraflokkur kvenna spilaði í Grill 66 deildinni í vetur en liðið náði í umspil í fyrra vor sem tapaðist að lokum fyrir Stjörnunni eftir 4 leiki. Tímabilið var strembið og gengið upp og ofan, en niðurstaðan varð sjöunda og næst neðsta sæti í deildinni. Þessi niðurstaða eru vissulega vonbrigði eftir að hafa verið í toppbaráttu í Grillinu og náð að spila í Olísdeildinni til skiptis síðustu 7 ár en það er ljóst að stefnan verður á að koma okkur aftur á þann stað á næsta tímabili. Í bikarkeppninni fengum við ÍR í fyrstu umferð líkt og árinu á undan, leikurinn fór fram á heimavelli í október en tapaðist.

Þjálfarateymið tók óvæntum breytingum um mitt sumar í fyrra þegar Jón Brynjar Björnsson flutti til Svíþjóðar. Örn Ingi Bjarkason hélt áfram þjálfun liðsins, en hann hafði verið aðstoðarþjálfari árið áður og inn í teymið með honum kom Andrés Gunnlaugsson. Þá kom Einar Bragason aftur til starfa sem markmannsþjálfari, Unnar Arnarsson sá um sjúkraþjálfun í leikjum og Jón Brynjar aðstoðaði teymið með klippingar og tölfræði. Leikmannahópurinn tók talsverðum breytingum í haust og komu Arna Sól Orradóttir og Agnes Ýr Bjarkadóttir úr Berserkjum, Karen Hrund Logadóttir og Sigurdís Sjöfn Freysdóttir úr FH, Þórdís Eva Elvarsdóttir úr HK, Kolbrún Arna Garðarsdóttir úr Fjölni, Elínborg Katla Þorbjörnsdóttir og Áslaug Ýr Bragadóttir frá Selfossi. Elínborg staldraði reyndar stutt við og fór yfir til Fram. Þá skipti Hulda Dagsdóttir yfir í Fram í haust, Saga Sif Gísladóttir hætti og Áróra Eir Pálsdóttir fór erlendis í nám og í barneignaleyfi, en auk þessa hafa Ragnhildur Hjartardóttir og Anna Katrín Bjarkadóttir verið í pásu í vetur og Úlfhildur Tinna Lárusdóttir tók hlé seinni hluta tímabilsin vegna barneigna.

Á tímabilinu hefur Katrín Helga Davíðsdóttir borið af í liðinu og má nefna að hún skoraði 48% marka liðsins í deildinni og er markadrottning Grill 66 deildarinnar með hvorki meira né minna en 204 mörk og er það langt fyrir ofan næstu leikmenn. Á lokahófi meistaraflokkanna vorið 2025 voru eftirtöldum leikmönnum veittar viðurkenningar, Ingibjörg Gróa Guðmundsdóttir mikilvægasti leikmaðurinn, Hulda Dagsdóttir besti leikmaðurinn, Ísabella Sól Huginsdóttir sú efnilegasta, Áróra Eir Pálsdóttir besti varnarmaðurinn og Brynja Rögn Ragnarsdóttir besti liðsmaðurinn, auk þess sem Katrín Helga Davíðsdóttir var mikilvægasti leikmaður umspilsins.

Í fyrra haust hófst vinna við að sameina stjórn Handknattleiksdeildarinnar, þ.a. yfir meistaraflokkunum sé ein stjórn, núverandi formaður deildarinnar er Sigurður Straumfjörð Pálsson. Það er þó ljóst að það þarf að vera skýrt hverjir fara fyrir starfinu hvoru megin, karla og kvenna, svo vel ráðist úr verkefnum. Davíð Svansson tók við formennsku í meistaraflokksráði kvenna vorið 2024, Erla Dögg Ragnarsdóttir er gjaldkeri og úr stjórn hafa Bjarki Sigurðsson og Gunnar Pétur Haraldsson komið að starfinu í vetur. Það eru væntingar um að sameiningin skili enn betri umjörð og árangri, því markmiðið er að koma kvennaliði Aftureldingar aftur í efstu deild og festa liðið í sessi á meðal þeirra bestu. Sterk umgjörð og góður andi skiptir öllu til að svo megi verða