Iðkendur hjá Blakdeild Aftureldingar koma úr öllum aldurshópum og því má segja að deildin sé ein stór lýðheilsudeild og samrýmist því vel gildum Mosfellsbæjar – Heilsueflandi samfélag.

Yngstu iðkendurnir sem æfðu á síðasta ári var U12 hópurinn og elstu iðkendurnir eru iðkendur í  karla-og kvennaliðunum okkar sem einnig taka þátt í Íslandsmótum neðri deilda og á Öldungamóti BLI en sá hópur samanstendur af iðkendum frá 22.ja ára aldri og eru elstu iðkendur okkar orðnir 60 ára+ og er það einstaklega ánægjulegt. Það er ekki sjálfsagt að fólk geti æft boltaíþróttir svo langt fram eftir aldri og því er það ennþá mikilvægara að iðkendur okkar á öllum aldri geti leikið sér og keppt saman því það ættu ekki að vera aldursfordómar í okkar íþrótt enda fólk á öllum aldri út um allt land sem stundar íþróttina okkar af miklum móð og lið sem samanstanda af mjög blönduðum aldri iðkenda og er það einmitt það fallega við íþróttina okkar. 

Afreksfólkið okkar spilar í úrvalsdeildum Íslandsmótsins og eru þau mörg hver okkar fulltrúar í landsliðum Íslands, bæði í  A -liðum sem og unglingalandsliðum.  

Samtals tóku 102 lið þátt í Íslandsmótum BLI  á leiktíðinni 2025-2026 og átti Blakdeild Aftureldingar samtals 9 lið í þeirri keppni eða tæp 10% af þátttökuliðunum.

Yngri flokka starfið:

Haldið er úti æfingum fyrir  U12, U14, U16/U18 og U20 hópum barna og unglinga og bendi ég á skýrslu BUR fyrir frekari upplýsingar.

BUR (Barna-og UnglingaRáð) sér um rekstur yngri flokka deildarinnar. Undanfarin ár hafa yngri flokkarnir okkar tekið þátt í Íslandsmótum fullorðinna og spilað í  neðri deildum og fengið góða spilareynslu sem er tilgangurinn með þátttökunni. Einnig hefur deildin verið með lið í 1.deild kvenna og í 1.deild karla þangað til í haust, og þannig hafa ungir leikmenn fengið tækifæri til að spila og fá mikilvæga reynslu. 

Keppnisárið 2024-2025 tóku ungu stelpurnar okkar í U16 og í U14 þátt í þessum mótum og okkar yngri leikmenn spiluðu í 1.deild kvenna og karla. Því miður þá náðist ekki að manna U20 karlalið í haust og U20 kvennaliðið var nú skipað yngri leikmönnum en áður þar sem leikmenn sem orðnir voru 20 ára fóru að æfa með neðri deildum eða úrvalsdeild.

Auk þess taka öll okkar börn og unglingar einnig þátt í Íslands-og bikarmótum í sínum aldursflokkum. 

Úrvalsdeildir karla og kvenna. 

Á leiktíðinni 2024-2025 tók Bartek Zielinski, sem hafði spilað stöðu frelsingja í karlaliðinu að sér þjálfun beggja liðanna okkar.  Bæði liðin fóru í úrslitakeppnina. Stelpurnar töpuðu undanúrslitarimmunni á móti Völsung og og karlaliðið tapaði sínum leikjum á móti KA sem síðar urðu Íslandsmeistarar.

Bartek hélt til síns heima eftir leiktíðina og hófst leitin af nýjum þjálfara. 

Tamas Kaposi var valin úr hópi umsækjanda og tók hann að sér þjálfun beggja liðanna í haust. Atli Fannar Pétursson var áfram aðstoðarþjálfari kvennaliðsins og var Elsa Særún Valgeirsdóttir ráðin sem aðstoðarþjálfari karlaliðsins.

Úrvalslið ársins:

Þar átti Afturelding besta kantsmassarann karlamegin sem var Jakub Grzegolec.

Kvennamegin var miðjuleikmaðurinn Valdís Unnur Einarsdóttir valin í draumaliðið.

Afreksstarf í hverju félagi er ákaflega mikilvægt og er það hornsteinninn í starfinu og til mikils að vinna að hafa gott og öflugt afreksstarf. Þangað stefna krakkarnir okkar sem eru að æfa og þau líta upp l leikmanna í meistaraflokkunum og því er gildi meistaraflokka í hverju íþróttafélagi ótrúlega mikið. Auk þess er afreksstarfið mikilvæg kynning hverju bæjarfélagi og sérstaklega þegar vel gengur. 

Til að geta haldið út öflugu og góðu afreksstarfi þar sem unga fólkið velur að iðka sínar íþróttir er þörf á áhuga allra iðkenda í deildinni og það krefst þess að allir leggi hönd á plóg og vinni að sama marki. 

Afreksstarfið er ekki einkamál afreksfólksins okkar. Til að búa til afreksfólk þá þarf umgjörð utan um starfið, bæði félagslega og íþróttalega. Íþróttafólkið okkar þarf að finna að það sé metið að verðleikum fyrir það sem þau leggja á sig fyrir félagið og íþróttina og þar komum við sjálfboðaliðarnir sterkir inn. 

Við þurfum fleiri og allir iðkendur innan deildarinnar þurfa að taka til sín hvað það varðar. Börnin okkar í U12, U14 og U16 hópunum hafa komið og staðið boltavakt á heimaleikjum og er það bæði skemmtilegt að sjá auk þess sem þau læra líka heilmikið af því að mæta og gefur þeim ákveðið félagslegt uppeldi að allir flokkar taki þátt í og aðstoði við að afreksstarfið blómstri innan félagsins og færi ég þeim miklar þakkir fyrir hvað þau hafa sinnt þessu einstaklega vel. Í öðrum félögum eru það neðri deildirnar sem sjá um að manna vinnuna á leikjum í úrvalsdeildinni en hjá okkur hefur okkur tekist að hafa það þannig að karlaliðið sér um kvennaleikina og öfugt. Þegar um tvíhöfða er að ræða þá hafa neðri deildirnar komið og hjálpað til.

Þjálfarar og uppbygging: 

Atli Fannar Pétursson, fyrstur íslenskra þjálfara fór á vegum blakdeildar Aftureldingar s.l. sumar og tók alþjóðleg þjálfararéttindi eða FIVB1 og erum við ákaflega ánægð með það. Inga Lilja Ingadóttir fór á vegum BLI á alþjóðlega þjálfararáðstefnu  hjá CEV ásamt fleirum Íslendingum sem haldið var í Króatíu í september. Daníela Grétarsdóttir og Inga Lilja Ingadóttir hafa einnig lokið blakþjálfaranámskeiðum hér heima og Daníela hefur verið aðstoðarþjálfari í U liðum á vegum BLI.

Neðri deildir:

Íslandsmót Blaksambands Íslands í neðri deildum samanstanda af  mótahaldi í 2.-7. deildum kvennamegi og þar eru 12 lið í deild. Karlamegin er 2.og 3.deild og 10-12 lið í deild. Auk þessa deilda er einnig spilaði í 1.deildum karla og kvenna og í þeim deildum er spilað heima og að heiman og 5 hrinu leikir. 

Afturelding var með eitt lið í 2. deild kvk. eitt lið í 3.deild karla og í 3.deild kvenna, í 4.deild kvk og í 5.d kvenna. Auk þess tóku unglingaliðin okkar þátt á vegum BUR og spiluðu í 5. og 7. deildum kvenna. Leikið er á þremur helgum og fara fyrstu 2 helgarnar í það að skipta liðum í efri og neðri hluta.  Þriðja helgin er svo úrslitahelgi um það hverjir fara upp um deild og hverjir fara niður um deild en í 12 liða deild eru það 3 lið sem fara upp og 3 liði sem falla. Annars eru það 2 lið ef færri lið eru í deild en 12 lið.

Að auki sendi Afturelding 4 kvennalið og tvö karlalið á Öldungamót BLI þar sem yfir 150 lið tóku þátt. (Sjá skýrslu neðri deildar ráðs)

Þessir hópar æfa 2-3svar í viku. Í haust þá varð sú breyting á að tímum blakdeildarinnar fækkaði í sal 3 og eru þessir hópar því að æfa tvisvar í viku í sal 2 við frekar erfiðar aðstæður þar sem mikið klístur (harpix)  ( er að jafnaði á gólfinu þar eftir iðkendur handboltans. Þetta er mjög bagalegt og býður upp á meiðslahættu auk þess sem klístrið festist í skóm iðkenda sem  berst síðan upp á dúkinn í sal 3.  Þetta er ekki ásættanlegt og hlýtur að þurfa að endurskoða þrifin ef ekki hægt er að hafa blakæfingarnar í sal 3. Fyrir utan þessi þrif sem ekki eru ásættanleg þá eru þrifin á gólfum íþróttahússins alls ekki í nægilega góðum farvegi og hafa leikmenn kvartað undan því undanfarin ár sem og í búningsklefunum. 

Landsliðsfólkið okkar:

Bæði karla-og kvennalið Íslands tóku þátt annað árið í röð í Silver league keppni Evrópu sem er undankeppni fyrir EM og karlalið Íslands fór auk þess á Smáþjóðaleikana sem og strandblakslið í bæði karla og kvennaflokki.

Í A landsliði kvenna í Silver League voru fulltrúar Aftureldingar: Amelía Ýr Sigurðardóttir, Rut Ragnarsdóttir Tinna Rut Þórarinsdóttir og Valdís Unnur Einarsdóttir.

Í A landsliði karla voru okkar fulltrúar:Atli Fannar Pétursson, Hafsteinn Már Sigurðsson, Kristinn Benedikt Gross Hannesson,  Kristinn Freyr Ómarsson, Sigþór Helgason sem því miður meiddist og gat því ekki farið með liðinu, og Valens Torfi Ingimundarson.  

Í strandblaksliði kvenna á Smáþjóðarleikunum var Thelma Dögg Grétarsdóttir okkar fulltrúi.

Starfsfólk á Smáþjóðarleikunum kom nánast allt frá Aftureldingu: Guðrún K Einarsdóttir var fararstjóri í öllum ferðum A landsliðs karla,Hilmir Berg Halldórsson fór sem leikgreinandi karlaliðsins, Ragnheiður Lóa Stefánsdóttir sjúkraþjálfari sem spilar í neðri deildum og Sunna Líf Arnarsdóttir fór sem leikgreinandi í strandblaki.

Fararstjóri kvennaliðsins í Silver League var Einar Friðgeir Björnsson úr stjórn mfl ráðs blakdeildar U-landsliðin: Emilía Dís Júlíusdóttir var valin til að fara með kvennalandsliðinu á Evrópumót Smáþjóða sem haldið var á Írlandi í júní. Auk þess var hún í U17 ára liði Íslands sem tók þátt í NEVZA mótinu í haust og var síðan valin í U19 ára landslið Íslands sem spilaði á Írlandi í janúar og sem tryggði sig inn á lokakeppni EM 2026 fyrst íslenskra landsliða í blaki en þjálfari liðsins var einnig frá Aftureldingu, Thelma Dögg Grétarsdóttir.

Blakfólk Aftureldingar 2025:

Atli Fannar Pétursson og Rut Ragnarsdóttir Rut Ragnarsdóttir var síðan valin Íþróttakona Aftureldingar.

Blakfólk Mosfellsbæjar voru Hilmir Berg Halldórsson og Rut Ragnarsdóttir.

Viðburðir á vegum deildarinnar á leiktíðinni 2024-2025

Í janúar 2025 sá meistaraflokksráð og leikmenn í úrvalsdeildum um helgarmót 2 á Íslandsmóti neðri deilda þar sem spilað var á 9 völlum frá laugardagsmorgni og fram yfir hádegi á sunnudegi. Leikmenn meistaraflokkanna sáu um alla dómgæslu og veitingasölu bæði inni í íþróttahúsinu sem og í Vallarhúsinu þar sem boðið var upp á heita mexíkóska súpu og pastasalat og brauð og hlaut mikið lof fyrir. Þetta er stórt mót og góð fjáröflun en heljar mikil vinna sem þó sparar okkar liðum í mótinu ferðakostnað þar sem Afturelding fær þær deildir sem okkar lið spila í og öll mótin eru haldin á höfuðborgarsvæðinu. 

Þær deildir sem spiluðu á mótinu voru: 3.deild karla og 4.5.og 6.deildir kvenna.

Í maí 2025 var haldið skólamót í blaki fyrir 5. og 6.bekki. Yfir 100  börn mættu frá ölum þremur skólunum í Mosfellsbæ og heppnaðist það mjög vel en það komu mun fleiri frá skólunum en hafði verið sagt svo það þurfti að bregðast við því á staðnum.  Krakkarnir skemmtu sér konunglega og íþróttakennararnir voru ánægðir. Til að stoðar komu stúlkurnar úr 9. og 10.bekk ásamt afreksstjóra BLI og þjálfurum í blakdeildinni. Þessi vettvangur er afar mikilvægur til að sýna og leyfa börnum að prufa þessa íþrótt því það 

Í fyrsta skitpi í sögu blakdeildarinnar var haldið úti sumarnámskeiðum fyrir börn og unglinga og sá yfirþjálfari BUR, Atli Fannar um námskeiðin og fékk til aðstoðar blakara sem komu á vegum ungingavinnu Mosfellsbæjar.  

Í ágúst á hverju ári sér Blakdeild Aftureldingar um Afreks- og hæfileikabúðir BLI á höfuðborgarsvæðinu þar sem börnum af öllu landinu er boðið að koma og æfa undir stjórn landsliðsþjálfara. Boðið er upp á hádegismat báða dagana fyrir alla þátttakendur og fyrirlestra fyrir krakkana í formi fræðslu um hin ýmsu mál t.d. næringu og endurheimt. 

Tindahlaup Mosfellsbæjar er orðið eitt af stærri utanvegahlaupum á landinu er samstarfsverkefni Blakdeildarinnar, Björgunarsveitarinnar Kyndill og Mosfellsbæjar og er haldið í tengslum við bæjarhátíðina Í túninu heima í lok ágúst. Þetta er ákaflega mikilvæg fjáröflun fyrir starfið í úrvalsdeildum félagsins og skemmtileg fjáröflun þar að auki þó að veðrið hækki töluvert skemmtanastuðulinn en leikmenn meistaraflokkanna okkar standa í vörslu á láglendi og í markinu.

Ein af fjáröflun deildarinnar er sala á skrauti til bæjarbúa fyrir bæjarhátíðina Í Túninu Heima.

Íþróttaskóli barnanna hjá Aftureldingu er verkefni sem blakdeildin hefur tekið að sér og rekið síðan haustið 2023. Yfirþjálfari íþróttaskólans er Valal, fyrrverandi styrktarþjálfari meistaraflokkanna okkar. Hún er einnig íþróttaakennari að mennt og í samvinnu við hana höfum við haldið úti íþróttaskóla fyrir börn á aldrinum 2-6 ára í Mosfellsbæ og eru á laugardagsmorgnum í 11 skipti á hvorri önn. Inga Lilja Ingadóttir sem kláraði íþróttafræði frá HR síðasta vor hefur tekið að sér flesta laugardaga í vetur en Valal er ennþá á hliðarlínunni og aðstoðar við að skipuleggja tímana.

Verkefnið gengur ákaflega vel og hafa yngri börn innan blakdeildarinnar komið inn sem aðstoðarþjálfarar,  Foreldrar eru ánægðir með íþróttaskólann þar sem áhersla er lögð á æfingar huga og handa og samhæfingar í skemmtilegum þrautum og skemmtilega samveru með foreldrum.

Minningarmót Mundu er haldið ár hvert þann 30.nóvember á afmælisdegi Mundínu Ásdísar Kristinsdóttur eða næst honum,en Munda lést langt fyrir aldur fram eftir hetjulega baráttu við krabbamein. Munda var ein af þeim sem sem byrjuðu að æfa blak og stóð að stofnun Blakdeildar Aftureldingar. Innkoma á mótið á síðasta ári rann til  Krafts.

BUR sá um bikarmót U14 og U20 í lok nóvember og tókst það mjög vel og var það stórt mót. Gist var í Kvíslarskóla og er þetta stærsta fjáröflun BUR á hverju ári. Því væri það vel þegið ef hægt væri að halda amk 2 barna-og unglingamót. 

Áramótið er fastur liður í og nauðsynlegur fasti í áramótahefð margra blakara á höfuðborgarsvæðinu og er það fjáröflun fyrir meistaraflokkanna en spilað er á Gamlársmorgun á 6 völlum.

Aftureldingarbúðin er rekin af blakdeildinni og er með ýmis konar varning merktu félaginu til sölu auk þess að hafa séð um sölu á skreytingum fyrir bæjarhátíðina okkar í ágúst.

Styrktaraðilar blakdeildarinnar:  

Bakki byggingarfélag er styrktaraðili blakdeildarinnar og er með merki sitt á skorklukkunni í salnum okkar. 

JAKO er með samning við Aftureldingu og spila því öll lið félagsins í búning frá JAKO.

Ölgerðin er styrktaraðili deildarinnar og beinir blakdeildin öllum drykkjarpöntunum til þeirra.

Höldur – Bílaleiga Akureyrar er styrktaraðili sem veitir félaginu bílaleigubíla á betri kjörum en annars þekkist og er ákaflega mikilvægt þegar farið er út á land í keppnisferðir.

Meistaraflokkarnir okkar spila með merki Krafts á búningum sínum í samstarfi við einkaaðila.

Mosfellsbakarí hefur látið okkur hafa bakkelsi handa leikmönnum eftir heimaleiki.

Myntkaup bættist við sem styrktaraðili á síðasta ári, þegar samþykkt var að íþróttamiðstöðin að Varmá yrði Myntkaup Höllin að Varmá.

Auk þess fáum við inn styrktaraðila í Kjörísbikarnum sem skipta miklu máli fyrir reksturinn ef okkar lið komast í FINAL 4 helgina eins og þau hafa gert undanfarin ár. 

Við erum ákaflega þakklát þeim sem leggja okkur lið og þessir styrkir skipta höfuðmáli fyrir rekstur deildarinnar.

Samvinna innan blakdeildarinnar er lykilatriði fyrir framgang og árangur, þar sem hún skapar sterkt samfélag sem nærir þátttakendur á öllum aldri og í öllum flokkum. Með sterku samstarfi getur blakdeildin orðið fyrirmynd fyrir íþróttahreyfinguna. Góð samvinna milli ráða innan deildarinnar er einnig mjög mikilvæg.

Ég vil enda þessa skýrslu mina á því að höfða til allra hópa innan blakdeildarinnar okkar hvað varðar aðkomu að starfi deildarinnar því samstarf þvert á hópa og deildir er hornsteinn í starfi allra íþróttafélaga um allan heim og mikil fyrirmynd í samfélaginu fyrir okkar yngri iðkendur og vil ég því hvetja alla iðkendur, stóra sem smáa til að taka þátt í þessu skemmtilega starfi og síðast en ekki síst að mæta á leiki hjá liðunum okkar og sérstaklega á heimaleikina en leikmenn tala um að það skipti höfuðmáli að finna stuðninginn úr stúkunni. 

Elstu hóparnir okkar eru fyrirmyndir meistaraflokkanna, og meistaraflokkarnir eru fyrirmyndir yngri iðkenda okkar og yngstu iðkendurnir okkar eru framtíðar meistarflokksleikmennirnir okkar og þannig helst hringrásin við.

Kærar þakkir til ykkar allra kæru sjálfboðaliðar sem takið þátt í starfinu með okkur. Án ykkar væri ekkert starf og sérstakar þakkir fá sjálfboðaliðar í ráðum innan blakdeildarinnar með kærri þökk fyrir ykkar ómetanlega framlag.

 

Fyrir hönd Blakdeildar Aftureldingar 

Guðrún Kristín Einarsdóttir

Formaður Blakdeildar Aftureldingar

Barna og ungliðaráð

Inngangur

Árið 2025 var áframhaldandi uppbyggingarár í barna- og unglingastarfi blakdeildarinnar, þar sem skýr merki sjást um stöðugan vöxt og aukinn styrk í starfseminni. Samhliða þeim vexti voru þó gerðar ákveðnar breytingar á skipulagi starfsins með það að markmiði að skýra betur hlutverk barna- og unglingaráðs og miða starfsemina við iðkendur 20 ára og yngri. Á fyrri hluta æfingatímabilsins voru enn eldri iðkendur innan starfseminnar, en á seinni hluta tímabilsins var farið eftir fyrr nefndum viðmiðum, með heimild til undanþágu fyrir einn iðkanda. Þessi breyting hafði áhrif á heildarfjölda iðkenda, sem fór úr 64 niður í 59 á árinu.

Breytingarnar höfðu einnig áhrif á keppnisfyrirkomulag. Hætt var við þátttöku í 1. deild karla, meðal annars vegna dræmrar mætingar á æfingar og þess kostnaðar sem fylgdi því að halda úti æfingum fyrir fámennan hóp. Þá tók yngri leikmannahópur við stærra hlutverki í 1. deild kvenna í stað eldri iðkenda, í samræmi við nýja stefnu félagsins. Áhyggjuefni síðustu ára er enn til staðar, en það er lítill fjöldi drengja í starfinu. Ljóst er að leggja þarf aukna og markvissa áherslu á uppbyggingu drengjastarfsins, með það að markmiði að ná að lágmarki þeim fjölda sem þarf til þátttöku í U16 keppnum, eða níu iðkendum. Samhliða því væri gott framtíðar markmið að efla þjálfun og þróun drengja þannig að þeir geti stigið upp í meistaraflokk félagsins til framtíðar. Þróunin í heild sinni er þó afar jákvæð og sýnir að markvisst starf er að skila árangri. Ljóst er að uppbygging og vöxtur deildarinnar má að stórum hluta rekja til öflugs starfs yfirþjálfara barna- og unglingastarfsins, Atla Fannars Péturssonar. Hann hefur sinnt starfinu af mikilli fagmennsku, elju og kostgæfni og hefur náð að skapa jákvætt og hvetjandi umhverfi þar sem iðkendur fá tækifæri til að blómstra. Barna- og unglingastarfið stendur því á sterkum grunni við lok árs 2025. Iðkendur sýna mikinn áhuga, dugnað og framfarir og horfur eru góðar fyrir áframhaldandi vöxt á komandi árum.

Deildin lítur björtum augum til framtíðar og mun halda áfram að byggja á þeim árangri sem þegar hefur náðst.

Stjórn BUR

Janúar – maí 2025:
Ólöf Birna Ólafsdóttir – formaður
Sigurgeir Hallgrímsson – gjaldkeri
Súsanna Finnbogadóttir – ritari
Pimpernel Verwijnen – meðstjórnandi
Þórhallur Sölvi Bárðarson – meðstjórnandi (hætti í janúar)
Kolbrún Ýr Oddgeirsdóttir – meðstjórnandi
Ágúst – desember 2025
Ólöf Birna Ólafsdóttir – formaður
Sigurgeir Hallgrímsson – gjaldkeri
Súsanna Finnbogadóttir – ritari
Pimpernel Verwijnen – meðstjórnandi
Þór Theodórsson – meðstjórnandi

Flokkar og iðkendur

Janúar – maí 2025
U lið kvenna (1.deild og 5.deild) – 17 iðkendur
U lið karla – 10 iðkendur
U16/U18 – 11 iðkendur
U14 blandað – 19 iðkendur
U12 blandað – 13 iðkendur

Athugið að skráningartölur yfir iðkendur eru teknar úr Abler í lok janúar 2025 en iðkendum fjölgaði jafnt og þétt yfir æfingatímabilið. Samtals voru 70 iðkendur skráðir
í lok janúar 2024.

Ágúst – desember 2025
U18/U20 kvenna – 8 iðkendur
U16 kvenna – 20 iðkendur
U14 blandað – 22 iðkendur
U10/U12 blandað – 9 iðkendur

Athugið að skráningartölur yfir iðkendur eru teknar úr Abler í lok desember 2025 en þá voru samtals 59 iðkendur skráðir. Ástæða fækkunar er rakin í inngangi þessarar  skýrslu, en vegna breytinga á skipulagi starfseminnar og þeirrar ákvörðunar að miða barna- og unglingastarf við iðkendur 20 ára og yngri fækkaði iðkendum.

Æfingar flokka

Janúar – maí 2025
U lið kvenna (1.deild / 5.deild) – 4 æfingar á viku + 1 styrktaræfing
U lið karla (1.deild karla) – 4 æfingar á viku + 1 styrktaræfing
U16/U18 – 4 æfingar á viku + 1 styrktaræfing
U14 blandað – 3 æfingar á viku + 1 styrktaræfing
U12 blandað – 3 æfingar á viku

Ágúst – desember 2025
U18/U20 kvenna – 4 æfingar í viku + 1 styrktaræfing
U16 kvenna – 4 æfingar í viku + 1 styrktaræfing
U14 blandað – 3 æfingar í viku og styrktaræfingar á æfingatímum
U10/U12 blandað – 3 æfingar í viku

Yfirþjálfari

Árið 2025 gegndi Atli Fannar Pétursson áfram starfi yfirþjálfara barna- og unglingastarfs (BUR) og hefur sú ráðning reynst afar farsæl. Ljóst er að starfsemi deildarinnar er að þróast í rétta átt undir hans stjórn, þar sem iðkendum hefur fjölgað og skipulag og gæði starfsins hafa styrkst til muna. Atli Fannar hefur sinnt hlutverki sínu af mikilli fagmennsku og kostgæfni. Hann hefur góða yfirsýn yfir daglegt starf, fylgist vel með stöðu æfinga og hefur brugðist markvisst við auknum iðkendafjölda með því að styrkja þjálfarateymi deildarinnar, meðal annars með ráðningu aðstoðarþjálfara eftir þörfum. Samskipti hans við þjálfara eru til fyrirmyndar og hann heldur vel utan um skipulag, samræmingu og eftirfylgni innan allra flokka. Einnig hefur samstarf hans við stjórn barna- og unglingaráðs verið afar gott, þar sem hann er ávallt aðgengilegur og tilbúinn til samráðs um þróun og uppbyggingu starfsins. Hann nær vel til iðkenda og hefur skapað jákvætt og hvetjandi æfingaumhverfi sem stuðlar að bæði framförum og aukinni þátttöku. Mikilvægt er að halda áfram á þeirri braut sem mörkuð hefur verið og tryggja stöðugleika í þjálfaramálum. Barna- og unglingaráð telur að áframhaldandi uppbygging og þróun deildarinnar sé best tryggð með Atla Fannari í hlutverki yfirþjálfara og leggur áherslu á að halda í hans starfskrafta til framtíðar.

Þjálfarar

Janúar – maí 2025
U20 / 1.deild kvenna – Atli Fannar Pétursson
U20 / 1.deild karla – Bartek Zielinski
5.deild kvenna – Daníela Grétarsdóttir
U16/U18 – Daníela Grétarsdóttir
U14 blandað – Inga Lilja Ingadóttir og Anna Sigríður Frímannsdóttir
U12 blandað – Atli Fannar Pétursson, Bryndís Ása Þórsdóttir, Emilía Dís
Júlíusdóttir, Sigrún Rúnarsdóttir og Snædís Erla Sigurgeirsdóttir
Ágúst – desember 2025
U18/U20 kvenna – Atli Fannar Pétursson
U16 kvenna – Daníela Grétarsdóttir, Atli Fannar Pétursson og Hafsteinn Már
Sigurðsson
U14 blandað – Atli Fannar Pétursson, Inga Lilja Ingadóttir og Sigrún Rúnarsdóttir
U10/U12 blandað – Inga Lilja Ingadóttir og Sigrún Rúnarsdóttir

Árangur í keppnum og mótum

1. deild kvenna (U20) vann til silfurverðlauna í U20/1. deild í mars
Lið Aftureldingar í 1. deild karla hafnaði í 3. sæti fyrri hluta árs 2025, en eins og áður hefur komið fram var liðið lagt niður í kjölfarið vegna dræmrar þátttöku á æfingum
U20 lið félagsins náði góðum árangri og vann B-deild bæði á haustmóti í september og bikarmóti í nóvember
U16 kvenna A-lið er í 2. sæti fyrir lokamót Íslandsmóts A-liða, en B-lið flokksins er í 5. sæti á Íslandsmóti B-liða
U14 drengir kepptu í sameiginlegu liði með Þrótti Nes og Sindra frá Höfn á bikarmóti og enduðu í 1. sæti. Þá eru þeir í 3. sæti á Íslandsmótinu fyrir lokamót vorsins
U14 kvenna A-lið (rauðar) endaði í 3. sæti á bikarmóti A-liða og er í 4. sæti á Íslandsmótinu fyrir lokamót
U14 kvenna B-lið (svartar) er í 3. sæti á Íslandsmótinu fyrir lokamót vorsins
Sameiginlegt lið U14 kvenna með KA endaði í 3. sæti á bikarmóti B-liða.

Annað

Mót að Varmá

Bikarmót U14 og U20 fór fram í desember 2025 að Varmá og tókst í heild sinni afar vel. Skipulag mótsins gekk vel og framkvæmdin var fagleg í alla staði. Gist var í Kvíslárskóla, en færri lið nýttu sér gistingu en á fyrri mótum sem félagið hefur haldið, sem hafði áhrif á tekjur af mótinu og varð hagnaður því minni en vonast hafði verið til. Framkvæmd mótsins byggðist sem fyrr á góðu starfi sjálfboðaliða, en ljóst er að þörf er á aukinni þátttöku foreldra og forráðamanna til að manna vaktir, svo sem í sjoppu, skólavöktum og öðrum verkefnum tengdum mótahaldi. Slík aðkoma er lykilatriði í því að tryggja bæði gæði og hagkvæmni við framkvæmd móta. Sérstaklega ber að þakka þeim einstaklingum innan stjórnar barna- og unglingaráðs sem lögðu mikla vinnu í undirbúning og framkvæmd mótsins. Framlag þeirra var afar mikilvægt og átti stóran þátt í því hversu vel til tókst með framkvæmd mótsins.

Landslið

Einn iðkandi innan Aftureldingar var í landsliðum Íslands árið 2025. Emilía Dís Júlíusdóttir var valin í A-landslið kvenna sem fór til Írlands og keppti á Evrópukeppni Smáþjóða (SCA) dagana 26.–29. júní. Hún var einnig valin í U18 landslið Íslands sem hélt til keppni í Írlandi í janúar 2026, þar sem liðið varð Evrópumeistari Smáþjóða og tryggði sér keppnisrétt á EM í júlí 2026.

Sumarnámskeið fyrir 1.-4.bekk

Sumarið 2025 var í fyrsta sinn boðið upp á sumarnámskeið fyrir börn í 1.–4. bekk ávegum blakdeildarinnar. Atli Fannar Pétursson, yfirþjálfari, sá um skipulagningu og kennslu námskeiðsins og fékk til liðs við sig Emilíu Dís Júlíusdóttur og Snædísi Erlu Sigurgeirsdóttur. Þær störfuðu við námskeiðið í gegnum vinnuskóla Mosfellsbæjar, en blakdeildinni var úthlutað tveimur starfsmönnum í tengslum við verkefnið.  Námskeiðin fóru fram á virkum dögum frá kl. 09:00–12:00 og gengu vel í alla staði, þó að þátttaka hefði mátt vera meiri. Tilraun var gerð til samstarfs við körfuboltadeild um sameiginlegt námskeið, en það náði því miður ekki fram að ganga. Fyrir næsta sumar er stefnt að því að leitast eftir samstarfi við aðrar deildir og bjóða upp á heils dags námskeið. Slík nálgun myndi bæði auðvelda foreldrum skipulag og auka fjölbreytni í dagskrá, sem er til hagsbóta fyrir þátttakendur.

Sumaræfingar fyrir eldri iðkendur

Sumarið 2025 var í fyrsta sinn boðið upp á sumarnámskeið fyrir eldri iðkendur, í samræmi við þá stefnu sem lögð var fram árið áður. Boðið var upp á þrjú sumartímabil fyrir hópa U12, U14, U16/18 og U20, þar sem áhersla var lögð á að viðhalda leikni, styrk og hreyfifærni yfir sumartímann. Hóparnir voru blandaðir, bæði hvað varðar kyn og aldur innan viðeigandi flokka, sem skapaði gott æfingaumhverfi og stuðlaði að aukinni samheldni milli iðkenda innan deildarinnar. Námskeiðin gengu vel og sýna mikilvægi þess að bjóða upp á samfellu í þjálfun yfir sumartímann. Slík  uppbygging styður við framfarir iðkenda og er mikilvægur þáttur í markvissri og faglegri þróun barna- og unglingastarfsins.

Æfingaferð erlendis

Árið 2025 var tekin ákvörðun um að endurvekja æfingaferðir erlendis fyrir U16 flokkinn, en slíkar ferðir voru áður fastur liður í starfi barna- og unglingaráðs fyrir COVID-19 faraldurinn. Í kjölfar faraldursins féll þessi þáttur niður og því eru nú eldri iðkendur sem ekki hafa áður fengið tækifæri til að taka þátt í slíkri ferð. Af þeim sökum var ákveðið að gefa eldri iðkendum kost á að taka þátt í ferðinni að þessu sinni, samhliða U16 flokknum. Þrátt fyrir að ákvörðunin hafi verið tekin seint á árinu 2025 var ákveðið að hefja undirbúning strax, meðal annars með jólafjáröflun til að styðja við iðkendur við að hefja söfnun fyrir ferðinni. Einnig var rætt um frekari fjáröflunarverkefni á komandi mánuðum. Áfangastaður ferðarinnar er Alicante á Spáni og hefur yfirþjálfari barna- og unglingastarfsins haft samband við þjálfara hjá Club Voleibol San Juan til að skipuleggja æfingar og samstarf á staðnum. Stefnt er að ferðinni dagana 30. apríl til 5. maí 2026. Markmiðið er að festa slíkar æfingaferðir aftur í sessi sem reglulegan þátt í starfinu og er stefnt að því að fara í sambærilega ferð annað hvert ár. Slíkar ferðir eru mikilvægur liður í að efla bæði félagsanda og íþróttalega þróun iðkenda.

Þátttaka í neðri deildum

Á fyrri hluta æfingatímabilsins 2025 tóku lið félagsins þátt í nokkrum deildum með góðum árangri. Lið í 1. deild kvenna komst alla leið í úrslit, þar sem það hafnaði í 2. sæti eftir tap í úrslitaleik og vann þar með silfurverðlaun. Jafnframt voru tvö lið skráð til leiks í 5. deild, annars vegar skipað eldri iðkendum og hins vegar U16 hópnum. Eldri iðkendurnir stóðu sig afar vel og unnu deildina, á meðan U16 hópurinn fékk mikilvæga keppnisreynslu. Eldra árið í U14 tók þátt í 6. deild og fékk þar dýrmæta reynslu. Á seinni hluta æfingatímabilsins var áfram lögð áhersla á að skapa iðkendum tækifæri til að öðlast dýrmæta keppnisreynslu með þátttöku í neðri deildum. Yngri hluti U16 hópsins tók þátt í 4. deild, á meðan reyndari iðkendur úr U14 hópnum tóku þátt í 7. deild. Samhliða því tóku eldri og reyndari iðkendur úr U16 og U18/U20 einnig þátt í 1. deild kvenna, þar sem þeir fengu tækifæri til að keppa á hærra stigi. Þessi samhliða þátttaka í
mismunandi deildum skapaði fjölbreytt og krefjandi umhverfi sem studdi vel við áframhaldandi þróun iðkenda. Þátttaka í deildum er mikilvægur liður í uppbyggingu iðkenda, þar sem hún gefur þeim tækifæri til að spreyta sig við ólíkar aðstæður og gegn leikmönnum með mismunandi reynslu. Slík reynsla stuðlar að auknu sjálfstrausti, bættum leikskilningi og styrkir iðkendur bæði tæknilega og andlega.

Horft til ársins 2026

Barna- og unglingaráð blakdeildarinnar horfir björtum augum til ársins 2026 og stefnir áfram að markvissri uppbyggingu á því öfluga starfi sem hefur verið í gangi undanfarin misseri. Ljóst er að sú þróun sem átt hefur sér stað er afrakstur skipulagðs og faglegs starfs og er mikilvægt að halda áfram á þeirri braut.
Lykilatriði í áframhaldandi uppbyggingu er að tryggja stöðugleika í þjálfaramálum. Barna- og unglingaráð leggur því ríka áherslu á að tryggja áframhaldandi starf yfirþjálfara, Atla Fannars Péturssonar, með framlengingu á samningi hans. Hans framlag hefur verið lykilþáttur í þeim árangri sem náðst hefur og er mikilvægt að byggja áfram á þeim grunni. Eitt af meginverkefnum næsta árs verður að efla drengjastarfið. Mikilvægt er að skapa aðstæður þar sem drengir sjá blakið sem raunhæfan og spennandi kost. Við viljum leggja okkar af mörkum til að hvetja til aukins samstarfs og skipulagningar æfinga þar sem drengir, bæði af höfuðborgarsvæðinu og víðar af landinu, fá tækifæri til að æfa saman og styrkja þannig bæði félagslegan og blaktengdan grunn sinn. Áfram verður lögð áhersla á að skapa öruggt, jákvætt og hvetjandi umhverfi þar sem iðkendum líður vel og hafa metnað til að bæta sig og ná árangri. Við munum halda áfram að bjóða upp á blak allt árið um kring, með sumaræfingum fyrir eldri iðkendur og sumarnámskeiðum fyrir yngstu börnin, þannig að samfella í þjálfun haldist. Einnig er mikilvægt að efla þátttöku foreldra og forráðamanna í starfinu. Stefnt er að því að fjölga foreldrum innan stjórnar barna- og unglingaráðsins og auka almennt aðkomu þeirra að verkefnum á borð við mótahald og aðra viðburði sem krefjast samstillts átaks. Öflug þátttaka foreldra er lykilforsenda fyrir áframhaldandi vexti og styrk starfseminnar. Barna- og unglingaráð mun halda áfram að byggja deildina markvisst upp með það að markmiði að festa sig í sessi meðal fremstu félaga landsins í yngri flokkum. Með áframhaldandi metnaði, fagmennsku og góðu samstarfi allra sem koma að starfinu er ljóst að framtíðin er björt.