Tímabilið 2025 var krefjandi á margan hátt. Liðið mætti mörgum áskorunum bæði innan og utan vallar en stelpurnar sýndu ótrúlegan karakter og samheldni allt tímabilið. Þær gáfust aldrei upp og lögðu hjarta og sál í hvert einasta verkefni, sama hvernig staðan var.

Um mitt tímabil kvöddum við þjálfarann okkar og í kjölfarið komu Sindri og Grétar inn í þjálfarateymið. Þeir komu með ferska orku, nýja sýn og mikinn metnað sem hafði jákvæð áhrif á hópinn. Þrátt fyrir að úrslitin hafi ekki alltaf fallið með okkur þá missti liðið ekki gleðina og hélt áfram að berjast til síðasta leiks.

Við féllum því miður niður í aðra deild en við horfum björtum augum til framtíðar. Mikil uppbygging er nú þegar hafin innan deildarinnar og fjölmargar efnilegar stelpur eru að stíga sín fyrstu skref í meistaraflokki. Á tímabilinu fengu nokkrir ungir leikmenn tækifæri til að spila sína fyrstu meistaraflokksleiki og samanstóð því liðið af blöndu af reynslumiklum leikmönnum og þeim yngri.

Utan vallar var mikið líf og gleði.

Við héldum kvennakvöld með glæsibrag þar sem samstaðan og andinn innan hópsins endurspeglaðist vel. Kvöldið tókst frábærlega og við hlökkum til að endurtaka leikinn á næsta ári.

Að lokum viljum við þakka öllum þeim sem lögðu hönd á plóg á tímabilinu sjálfboðaliðum, stuðningsfólki og þeim sem hjálpuðu okkur með heimaleikina. Án ykkar væri þetta allt saman ekki mögulegt. Við erum þakklát fyrir ykkar ómetanlega framlag og hlökkum til að halda áfram þessari vegferð saman. Bjartir tímar eru framundan og mikill kraftur innan ráðsins til að takast á við næsta tímabil.

Hafdís Sæland

Formaður meistaraflokks kvenna