Aðalfundur Aftureldingar fór fram 30. apríl 2025.

Aðalstjórn félagsins 2025 – 2026:

Ásgeir Jónsson, formaður (kjörinn á aðalfundi)

Hrafn Ingvarsson, varaformaður

Hildur Björg Bæringsdóttir, gjaldkeri

Geirarður Þórir Long, ritari

Aðalheiður Helgadóttir, meðstjórnandi

Sonja Ósk Gunnarsdóttir, meðstjórnandi

Níels Reynisson, meðstjórnandi

Helstu viðburðir úr starfi félagsins 2025:

Árið 2025 einkenndist af uppbyggingu á innviðum félagsins og aðstöðu. Núverandi aðalstjórn og skrifstofa héldu áfram að byggja upp og straumlínulaga stafræna innviði félagsins til að efla þjónustu við deildir og sjálfboðaliða. Sameiginleg gagnasvæði voru tekin í notkun, bókhald, áætlanagerð og reikningaskil einfölduð og samtöl og samvinna milli skrifstofu og deilda styrkt enn frekar. Lög félagsins og reglugerðir voru tekin til gagngerðar endurskoðunar og þróun á samspili og samvinnu við Mosfellsbæ um frístundarútu og æfingatöflu félagsins, með það að markmiði að efla þjónustu við iðkendur hélt áfram. Aðalstjórn réðst í umfangsmikið verkefni í samstarfi við Birnu Kristínu Jónsdóttur og Thelmu Dögg Grétarsdóttur sem ber yfirskriftina Fyrir Aftureldingu. Verkefnið er byggt upp í kringum vinnustofur með iðkendum, þjálfurum og forráðamönnum með það fyrir augum að þróa og innleiða sameiginleg gildi, efla jákvæða menningu og safna um leið gögnum um upplifun þessara hópa af starfsemi félagsins.

Þá hélt aðstöðuuppbygging áfram á árinu 2025. Nýtt gervigras á „gamla“ Varmárvelli var tekið í notkun og heldur uppbygging á framtíðar aðalvelli áfram þar á komandi árum. Á árinu 2026 verður tekin í gagnið þar ný frjálsíþróttaðastaða. Vegleg stúkubygging er á framkvæmdaráætlun á komandi árum og verður hún lokahnikkurinn á endurnýjuðum Varmárvelli. Framkvæmdir á nýrri félagsaðstöðu inni í íþróttahúsinu hófust og munu þeim ljúka á vormánuðum 2026. Þá var lagt kapp á að gera merki og liti Aftureldingar sjáanlegri á öllu svæðinu. Einnig var mikil uppbygging á bráðabirgðaraðstöðu knattspyrnudeildar á „nýja“ vellinum þar sem karlalið félagsins keppti í fyrsta sinn í efstu deild. Var öflug umgjörð og stemmning á vellinum umtöluð. Áframhaldandi þróunarvinna í kringum þjónustubyggingu að Varmá hélt áfram en sú framkvæmd hefur tafist árum saman. Útlit er fyrir að hreyfing komist loks á þá framkvæmd 2026 sem verður gríðarlegt framfaraskref fyrir félagið allt.

Áfram hélt íþróttafólk Aftureldingar að ná frábærum árangri. Rúmlega 40 iðkendur hlutu viðurkenningu fyrir þátttöku í landsliðsverkefnum í sínum greinum og rúmlega 20 iðkendur í viðbót fyrir þátttöku í hæfileikamótun sérsambanda. Einar Baldvin Baldvinsson, handknattleiksmaður, og Rut Ragnarsdóttir, blakkona, voru kjörin íþróttafólk Aftureldingar.

Á starfsárinu 2025 tóku tæplega 3.800 virkir iðkendur (iðkanir) á öllum aldri þátt í starfi félagsins, og yfir 200 þjálfar. Að ógleymdum öllum okkar frábæru sjálfboðaliðum sem vinna ómetanlegt starf alla daga innan deilda félagsins.

Yngri flokka starfið hélt áfram að dafna, en samtals voru virkir iðkendur innan 11 deilda á aldrinu  4 – 18 ára, 2.548 á árinu. Knattspyrnudeildin er stærst deilda með um 32% iðkenda, þá kemur fimleikadeildin með 31% og handknattleiksdeildin með 13%. Aðrar deildir eru fámennari.

Á kosningaárinu sem nú er gengið í garð eru stór verkefni framundan hjá félaginu öllu. Í samvinnu við þann meirihluta sem tekur til starfa að kosningum loknum þarf félagið skýr svör um hvenær uppbyggingu á Varmárvelli lýkur, hvenær áðurnefnd þjónustubygging endanlega rís, hvernig svæðið í kringum Varmá verður endurskipulagt með tilliti til aukinnar umferðar á sem þegar er erfitt með að anna henni. Síðast en ekki síst öflugt samtal og skýra sýn allra aðila um framtíðaruppbyggingu íþróttamannvirkja í Blikastaðalandi.

ÁFRAM AFTURELDING

Ásgeir Jónsson