Nýliðið starfsár handknattleiksdeildar var viðburðarríkt. Starfsemi BUR heldur áfram að þroskast og meistaraflokkarnir fóru í gegnum sveiflukennd tímabil í sínum deildum. Samstarf hefur verið aukið til muna milli BUR og meistaraflokkana og er það vilji stjórnar að byggja áfram á því farsæla samstarfi og halda áfram að byggja upp öflugt barna- og unglingastarf, afreksstarf og meistaraflokka þar sem undirstaðan eru uppaldir leikmenn úr Mosfellsbæ. Meistaraflokkarnir tveir stigu stórt skref í upphafi rekstrarárs þar sem deildirnar eru nú reknar saman sem ein heild, samanber ákvörðun á síðasta aðalfundi. Þá hefur deildin haft til hliðsjónar skipurit deildarinnar sem var samþykkt á síðasta aðalfundi. Markaðsstarf, samstörf við fyrirtæki og styrktaraðila, fjáraflanir og fjárhagur er nú sameiginlegt með meistaraflokkunum og er það nokkuð ljóst eftir fyrsta árið að sameinaðir standa meistaraflokkarnir sterkari en áður. Styrktaraðilum hefur fjölgað, þar sem stórir aðilar eins Myntkaup, Ístak og Bauhaus hafa myndað samstarf með deildinni í vetur.

Af reynslu vetrarins að dæma þurfa hlutverkaskipti innan stjórnar að vera skýr og aðilar með leiðandi hlutverk í kvenna- og karlaflokkum svo að vel ráðist úr verkefnum. Davíð Svansson fór fyrir meistaraflokki kvenna í vetur, og Sigurður Straumfjörð fyrir meistaraflokki karla. Það er öflugt net aðila í baklandi meistaraflokks karla;
meistaraflokksráðið. Styrkja þarf bakland meistaraflokks kvenna, en starfsemin hefur verið á höndum fárra aðila. Það eru væntingar um að sameining rekstrar meistaraflokkana skili enn betri umjörð og árangri á komandi tímabili. Það er yfirlýst markmið að koma kvennaliði Aftureldingar aftur í efstu deild og festa liðið í sessi á meðal þeirra bestu samhliða því að styrkja sess meistaraflokks karla meðal bestu liða landsins. Sterk umgjörð og góður andi skiptir öllu til að svo megi verða.

Stjórn deildarinnar er reynslunni ríkari eftir veturinn og er deildin í stakk búin að taka næsta skref í að styrkja skipulag og rekstur deildarinnar í heild sinni og mun stjórn leggja undir aðalfund tillögur þess efnis.